Lançamento de 22 Romances Inconclusos de Quico Cadaval

Cadaval

Ediçóns do Trece tem o prazer de vos convidar ao lançamento dos “22 Romances Inconclusos” de Quico Cadaval, sétimo número do Lapis do Taberneiro, a colecçom literária mais libertina da Galiza. O livro é o compendio dos romances escritos polo autor em performance sem igual acontecida em 27 de Fevereiro no Café Bar Trece, promotora da colecçom, durante quase vinte horas de literatura ao vivo, transmitida na altura a través da rede. Os “22 Romances Inconclusos” recolhem o universo infindo do grande narrador oral de Ribeira, mestre da imaginaçom sem continente, que nesta ocasiom aposta por aquele conceito renascentista da terribilitá, que supom evitar-lhe ao leitor desenganados remates. Literatura de princípios escrita na taberna para ler na taberna, na que desfilam traficantes de diamantes, francotiradoras, karatekas eróticos, marinheiros sem destino, páxaros cromáticos, e outras espécies humanas que deliciaram a mente dos leitores e leitoras.

Cadaval vém engrosar assim a lista de autoras e autores da colecçom mais tabernaria da literatura galega, junto de Mingolo Alborés, Raquel Miragaia, Carlos Meixide, Marga Alborés, Sechu Sende ou Carlos Santiago. A colecçom, completamente esgotada nos seus anteriores números, volve-se relançar com a aposta do autor ribeirám pola arte do relato instantáneo, redigida numha performance quase warholiana: 20 horas de escrita sobre a mesa dumha taberna.

Amanhã, desde as oito e meia da tarde, no Café Bar Trece, em ato apresentado por Carlos Santiago, editor da colecçom, e com a participaçom do próprio autor e amigos entranháveis como Victor Mosqueira. Será projectado pequeno documentário no que se evocará a longínqua perfomance de Fevreiro, e tudo isto regado com os caldos mais requintados do local.

Advertisement

Etiquetas: Café Bar Trece, Lápis do Taberneiro, Literatura, Quico Cadaval